Brad Pitt vann kapphlaupið

Hjartaknúsarinn Brad Pitt varð á undan kollega sínum Leonardo DiCaprio í kapphlaupi um að tryggja sér kvikmyndaréttinn að bókinni World War Z.

Bókin, sem er eftir Max Broks, gerist tíu árum eftir að uppvakningar leggja undir sig heiminn. Bókin er framhald Zombie Survival Guide sem kom út árið 2003.

Framleiðslufyrirtæki Pitts, Plan B, og kvikmyndaverið Paramount Pictures áttu í harðri baráttu um réttinn við fyrirtæki DiCaprios, Applan Way, sem hafði einnig boðið í hann með hjálp Warner Bros.

Næsta mynd Leonardos DiCaprio nefnist The Departed og er einmitt framleidd af Plan B. Um glæpamynd er að ræða sem er leikstýrt af Martin Scorsese. Pitt fer næst með hlutverk Jesse James í væntanlegri mynd um útlagann fræga.