Tattú fyrir Kelduna

Útvarpsstöðin X-ið 977 hefur staðið fyrir leik síðustu vikur þar sem hlustendur hafa getað unnið sér inn miða á Hróarskelduhátíðina í lok mánaðarins.

Í dag gefst hlustendum stöðvarinnar tækifæri til að vinna sér inn sannkallaðan bónusvinning. Fyrsti hlustandinn sem mætir á Íslensku húðflúrstofuna á Hverfisgötu á milli 15-17 í dag og lætur flúra á sig lógó útvarpsstöðvarinnar, fær að launum VIP-miða á Hróarskeldu fyrir tvo.

Ég held að það sé fullt af hressum rokkurum sem væru til í þetta. Miðað við þá hlustendur okkar sem mæta á uppákomur okkar og hringja inn á stöðina þá hef ég engar áhyggjur. Það eru margir nógu léttgeggjaðir, segir Frosti Logason dagskrárstjóri X-ins.

Hann segir að krafist verði ákveðinnar lágmarksstærðar á X-tattúinu en ekki séu hins vegar gerðar kröfur um staðsetningu. Þetta þarf ekkert að vera á enninu en við værum örugglega til í að bæta bjórkassa við verðlaunin ef einhver gerir það, segir Frosti hlæjandi. Útvarpað verður beint frá þessum viðburði í þætti Dóra DNA í dag.