Freyr Gígja Gunnarsson skrifar um kvikmyndir Al Pacino sem Han Solo?

Að velja í hlutverk getur reynst leikstjórum erfitt. Aðalhlutverkið þarf að vera vel mannað af leikara sem kvikmyndahúsagestinum finnst vera trúverðugur í hlutverkinu. Peter Jackson reyndist vera snjall þegar hann réð Viggo Mortensen í hlutverk Aragorns.

Írski leikarinn Stuart Townsend hafði hins vegar verið í föruneytinu í fjóra daga sem hinn aðalsborna hetja áður en Jackson gerði sér grein fyrir að leikarinn þyrfti að vera eldri.

Eflaust finnst flestum ómöglegt að sjá einhvern annan en Marlon Brando í hlutverki guðföðursins Don Vito Corleone. Engu að síður vildi kvikmyndaverið fá Frank Sinatra í hlutverkið. Taldi hann geta trekkt betur að. Þeir fengu því hland fyrir hjartað þegar Francis Ford Coppola stakk uppá ólíkindartólinu Brando sem var þekktur fyrir sérvisku og gat tekið uppá hverju sem er á meðan tökum stóð.

Þegar horft er á Guðföðurinn er hálf asnalegt að sjá einhvern annan fyrir sér en Brando í því hlutverki. Leikarinn tróð bómul uppí kjaftinn á sér og náði fram svipbrigðum og túlkun sem eiga vafalítið ekki eftir að sjást aftur á hvíta tjaldinu.

Harrison Ford var klæðskerasniðin fyrir Han Solo - hlutverkið í Stjörnustríðsmyndunum fyrri en það var upphafið að glæstum ferli hans sem Hollywood - stórstjarna. Nánast ómöglegt er fyrir mig að sjá einhvern annan í hlutverki þessa flugstjóra sem reif kjaft við allt og alla og var hundeltur af óþjóðalýð í sólkerfinu. George Lucas vildi hins vegar ekki vinna með einhverjum sem hafði leikið í kvikmynd eftir hann áður og Ford var því útilokaður í fyrstu vegna hlutverks síns í American Graffiti.

Lucas bauð leikurum á borð við Kurt Russell, Nick Nolte, Christopher Walken og Al Pacino að leika Han Solo. Leikstjórinn íhugaði meðal annars að gera Han Solo svartan og hafði nánast ráðið Glynn Turman í hlutverkið. Lucas hætti hins vegar við allt saman og fékk Harrison Ford til að fljúga með Chewbacca, Luke Skywalker og prinsessuna Leiu.

Hvort Stjörnustríðið hefði orðið eitthvað verra ef Al Pacino hefði hlaupið undan stormsveitarmönnununm með Alec Guiness verður hins vegar aldrei skorið úr um.