Þrettán ástarlög

Platan Íslensk ástarlög er komin í verslanir á vegum Senu og Steinsnars. Á plötunni fara fimm glæsilegar söngkonur á kostum í flutningi sínum á þrettán íslenskum dægurperlum.

Fyrsta lag plötunnar er eftir Bubba Morthens, Með þér, og er í flutningi Ragnheiðar Gröndal. Það er einmitt vinsælasta lagið á landinu um þessar mundir. Hinar söngkonurnar sem syngja á plötunni eru Hildur Vala, Ellen Kristjánsdóttir, Andrea Gylfadóttir og Sigríður Eyþórsdóttir.

Fjögur áður óútgefin lög eru á plötunni. Jón Ólafsson á lagið Perlan sem Sigríður Eyþórsdóttir syngur, Magnús Þór Sigmundsson á lögin Sólstafir og Þú ert mér allt og Ragnheiður Gröndal frumflytur lag sitt Sólon Íslandus.