Getur ekki toppað Hótel Tindastól

Enski gamanleikarinn John Cleese er hættur að semja og leika í gamanþáttum vegna þess að hann telur sig ekki geta toppað hina vinsælu þáttaröð Fawlty Towers, eða Hótel Tindastóll.

Þess í stað ætlar Cleese, sem gerði garðinn frægan með Monty Python-leikhópnum, að gefa út bók um sögu grínsins. Einnig ætlar hann að halda fyrirlestra þar sem hann útskýrir hvernig á að fá fólk til að hlæja.

Það er mjög sjaldgæft nú til dags að sjá einhvern ná þessari gömlu og góðu fyndni, sagði Cleese. Síðasta frábæra frammistaða einhvers var þegar ég sá Eddie Izzard. En Ricky Gervais er einnig náungi sem jafnast á við það besta sem hefur komið úr bandarísku sjónvarpi, sagði hann.

Cleese, sem er 66 ára, hefur haft í ýmsu að snúast undanfarin ár. Hann hefur leikið tæknitröllið Q í James Bond-myndunum, ljáð Haraldi konungi rödd sína í Shrek 2 og Shrek 3 sem er í vinnslu, auk þess sem hann átti þátt í að semja handritið að næstu teiknimynd þeirra sem sendu síðast frá sér hina vinsælu Wallace and Gromit.