Sextíu aukalög frá Bubba

Í tilefni af fimmtugsafmæli Bubba Morthens þann 6. júní munu Íslenskir tónar gefa út níu af fyrstu sólóplötum Bubba í veglegum afmælisbúningi þennan sama dag.

Um er að ræða plöturnar Plágan, Fingraför, Ný spor, Frelsi til sölu, Dögun, 56, Bláir, Nóttin langa og Sögur af landi. Plöturnar innihalda samtals 60 aukalög sem sum hver hafa aldrei áður komið út á geislaplötum og mörg hafa aldrei komið út áður. Þarna er að finna blöndu af prufuupptökum, upptökum á ensku, upptökum af tónleikum og jafnvel lög sem hafa aldrei áður heyrst. Meðal annars hefur stuttskífan 56 ekki verið fáanlega á geislaplötu í meira en áratug. Auk þess má nefna að Bláir er hlutur Bubba af verki hans og Megasar, Bláir Draumar. Árið 2002 sendi Megas frá sér sinn hluta verksins undir nafninu Englaryk í tímaglasi.

Í fyrra komu út plöturnar Ísbjarnarblús og Kona í samskonar veglegum afmælisbúningi.  Sólóplötur Bubba frá árunum 1991 til nútímans koma síðan út í svipuðum búningi á næstu misserum.