Fyrsta lag Start í 25 ár

Hljómsveitin Start, með Eirík Hauksson í fararbroddi, gefur út nýtt lag á safnplötu sem kemur út þann 7. júlí.

Lagið nefnist Heilræðavísur og er það fyrsta frá sveitinni frá árinu 1981, eða í 25 ár. "Þetta er lag sem ég fann í Noregi sem ég á. Ég átti texta síðan 1984 eða "85 sem smellpassaði fyrir þetta ákveðna lag. Þannig að við skelltum því í upptökur," segir Eiríkur. "Þetta er frekar einfaldur rokkari. Við erum svona rétt að minna á okkur," segir hann. Hann útilokar ekki að stór plata verði tekin upp með sveitinni í framtíðinni.

Start spilar á Players í Kópavogi á laugardagskvöld. Sveitin spilaði síðast á Players í apríl við mjög góðar undirtektir og ákvað því að endurtaka leikinn. "Við höfðum voðalega gaman að þessu síðast og okkur langaði að prófa aftur," segir Eiríkur.