Þekkt nöfn á Innipúkanum

Hljómsveitirnar Television og Throwing Muses eru á meðal þeirra sem munu koma fram á tónlistarhátíðinni Innipúkanum sem verður haldin á Nasa dagana 4. til 6. ágúst.

Television var stofnuð í New York í byrjun áttunda áratugarins og telst til goðsagna í listrokks-geiranum. Margar þekktar sveitir hafa litið upp til Television, þar á meðal The Strokes, Sonic Youth og hin íslenska Kimono.

Indísveitin Throwing Muses kemur frá Boston og varð til árið 1981 þegar hálfsysturnar Kirstin Hersh og Tanya Donelly byrjuðu að gutla saman. Sveitin varð sú fyrsta frá Bandaríkjunum til að fá samning hjá Lundúnarmerkinu 4AD, en samferðarmenn Throwing Muses frá Boston, The Pixies, bættust bráðlega í hópinn.

Á meðal fleiri nafna sem koma fram á Innipúkanum eru Mugison, Jakobínarína, Hjálmar, Ég, Mammút, Ampop, Jeff Who?, Speaker Bite Me, Solex og Jomi Massage.

Innipúkinn er nú haldinn í fimmta sinn í miðborg Reykjavíkur og er tilgangurinn að bjóða upp á góða tónlist í Reykjavík á meðan útihátíðir standa yfir um verslunarmannahelgina. Tónleikar hefjast alla dagana klukkan 18 og stendur gleðin fram á rauða nótt alla dagana.

Miðasala á hátíðina hefst í dag klukkan 10 á midi.is og í verslun Hive, auk Skífuverslana og BT á landsbyggðinni. Hægt verður að kaupa passa á alla hátíðina og einstaka daga líka. Passi kostar 5.900 kr. auk miðagjalds og dagspassi kostar 2.600 kr. auk miðagjalds. Nánari upplýsingar má finna á www.innipukinn.is.