Tekur sér ársfrí eftir erfiðan bakuppskurð

„Því miður verð ég ekki með hópnum í ár, er að kljást við afleiðingar af bakuppskurði og verð alveg frá í heilt ár. Menn þurfa að vera við hestaheilsu og gott betur en það til að standa í þessu," segir Jónatan Garðarsson sem hefur verið viðloðandi Evróvisjón-keppnina fyrir hönd Ríkissjónvarpsins síðan 2001.

„Ég fór reyndar sem fulltrúi plötufyrirtækja til Sviss árið 1989 þegar Valgeir Guðjónsson og Daníel Ágúst Haraldsson kepptu fyrir hönd Íslands og var síðan ráðgjafi Sigurðar Valgeirssonar þegar lag Selmu Björnsdóttur, All out of Luck, varð fyrir valinu," útskýrir Jónatan sem tók síðan formlega við embættinu ef svo mætti kalla árið 2001. „Starfið felst fyrst og fremst í því að vera tengiliður milli Sjónvarpsins og Sambands evrópskra sjónvarpsstöðva, sitja fundi og sinna alls kyns skriffinnsku," segir Jónatan sem segist hugsa til þess með söknuði að taka ekki þátt í Evróvisjón. „Ég hef eignast marga góða vini í kringum þetta og það er svekkjandi að komast ekki til Finnlands sem ég hef verið í góðum samskiptum við, Það er með þetta eins og annað, að nýir vendir sópa best," segir Jónatan. Hann hefur sömuleiðis verið í leyfi frá Kastljósinu vegna bakuppskurðarins.

Páll Magnússon útvarpsstjóri sagði vissulega eftirsjá í Jónatani. „Hann hefur verið hluti af ásjónu þessarar keppni," segir Páll. Það er Kristín Erna Arnardóttir sem tekur við þessu vandasama starfi. „Hún hefur verið að vinna við áramótaskaupið en það er verið að losa hana út úr því," segir Páll.

Alls 188 lög voru send inn fyrir forval Evróvisjón-keppninnar í ár en skilafrestur rann út 16. nóvember. Samkvæmt Rafni Rafnssyni hjá Basecamp er þetta ögn minna heldur en í fyrra sem helgast af því að hver lagahöfundur mátti eingöngu senda inn þrjú lög. „Við reiknum því með að það sé meiri breidd í lagasmíðunum," segir Rafn en leynileg nefnd sest nú yfir lokuðu umslögin og velur þau 24 lög sem keppa um að verða framlag Íslands í Finnlandi en þar fer keppnin fram eftir glæsilegan sigur skrímslasveitarinnar Lordi. Fyrirkomulagið verður með svipuðum hætti og í fyrra en þrjú undankvöld verða í janúar og eitt úrslitakvöld hvar þjóðin kýs framlag sitt.