Píslarganga Krists umdeildasta myndin

Kvikmyndin The Passion of the Christ hefur verið kjörin umdeildasta mynd allra tíma af bandaríska tímaritinu Entertainment Weekly.

Myndinni var leikstýrt af Mel Gibson og fjallar hún um síðustu tólf klukkustundirnar í lífi Jesú Krists. Myndin var gagnrýnd harðlega víða um heim vegna mikils ofbeldis auk þess sem margir töldu hana gera lítið úr gyðingum.

Í öðru sæti yfir umdeildustu myndirnar var A Clockwork Orange eftir Stanley Kubrick frá árinu 1971. Fjallar hún um ungan mann sem er dæmdur til að gangast undir stranga meðferð til að vinna bug á meintri ofbeldisfíkn sinni.

Leikstjórinn Oliver Stone á tvær myndir á meðal þeirra 25 umdeildustu. JFK er í fimmta sæti en Natural Born Killers í því áttunda. Kvikmyndin The Da Vinci Code er í því 13, en einnig eru á listanum myndir á borð við Fahrenheit 9/11, Deep Throat, The Last Temptation of Christ, The Deer Hunter, Basic Instinct, Do the Right Thing og Kids.