Fegurðardrottningin stödd á HM í Þýskalandi

Unnur Birna Vilhjálmsdóttir kom sér í heimsfréttirnar því Reuters fréttastofan greindi frá því í gær að fegurðardrottningin væri mætt á Heimsmeistarakeppnina í Þýskalandi sem nú tröllríður sjónvörpum landsmanna. Þar var hún spurð hver væri fallegasti maður keppninnar og ekki stóð á svarinu. „David Beckham. Hann hefur allt, útlitið, hárið og línurnar, Beckham er hinn dæmigerði metró - sexual maður,“ svaraði Unnur Birna en bætti því við hún myndi seint fara á stefnumót með fyrirliða enska landsliðsins. „Ég er ekki mikið fyrir fræga karlmenn, vil heldur einhverja sem eru jarðbundnir,“ sagði Unnur Birna og svaraði því jafnframt til að hún væri á lausu.

Unni Birnu var boðið á leik Króatíu og Brasilíu á HM sem háður var í gærkvöldi og Fréttablaðið náði tali af henni fyrir herlegheitin. „Ég er búin að vera á leikvanginum í dag í myndatökum og viðtölum, brasilísku stuðningsmennirnir eru komnir og það var ólýsanlega stemmning hjá þeim, tónlist, söngur og trommur. Þetta verður örugglega svakaleg upplifun,“ sagði Unnur Birna. Hún var á VIP svæði leikvallarins sem gestur Huyndai ásamt aðstoðarmanni frá Miss World. „Það verður matur á undan og svaka flott enda hef ég lúmskt gaman af fótbolta,“ segir Unnur Birna.

Hún flaug til Berlínar frá Varsjá í Póllandi þar sem hún var viðstödd verðlaunaafhendingu ásamt forseta Póllands. Í Póllandi lenti hún í þeirri skemmtilegu stöðu að verða guðmóðir tveggja sebrahesta sem fæddust fyrir tveimur vikum í dýragarði þar á bæ. Sebrahestarnir voru skírðir eftir guðmóður sinni sem einnig var viðstödd skírnina. „Það fylgdi ekkert sögunni hvort dýrin væru karlkyns eða kvenkyns, þau fengu bara nöfnin U og B. Þau hjá Miss World kalla mig það, hafa gert það alveg frá upphafi,“ segir Unnur Birna.

Framundan er galakvöldverður Rauða krossins í London á föstudag, kynning á tískusýningu í Sviss á laugardag og því næst flakk um Bretland, og í lok næstu viku er ferðinni heitið til Kína. „Ég kem ekkert heim fyrr en í lok júni. Þetta flakk er virkilega skemmtilegt en alveg hörkuvinna. Ég er alltaf á hraðferð og verð þreytt á því að fara út á hverjum einasta morgni máluð og í fínum fötum eins og maður sé að fara á gala ball. Það er ekki það skemmtilegasta sem ég geri,“ sagði Unnur Birna.