Magnað sjónarspil Waters í Egilshöll

Gífurleg stemning var á tónleikum Roger Waters, fyrrverandi forsprakka Pink Floyd, í Egilshöll í fyrrakvöld. Um fimmtán þúsund manns voru samankomnir höllinni til að hlýða á þessa miklu goðsögn í tónlistarheiminum og varð vafalítið enginn fyrir vonbrigðum með útkomuna.

Eins og gefur að skilja var þarna mikið um fólk á fertugs- og fimmtugsaldri sem kom til að sjá og heyra eina af hetjunum sínum frá því í æsku en einnig voru þarna yngri tónlistarunnendur sem hafa uppgötvað Floyd, jafnvel í gegnum foreldra sína.

Eins og efnisskráin sagði til um spilaði Waters plötuna Dark Side of the Moon í heild sinni með öllum sínum gullmolum auk þess sem aðrir þekktir slagarar fengu að njóta sín í öflugu hljóðkerfinu. Má þar meðal annars nefna Wish You Were Here, Another Brick in the Wall og Comfortably Numb.

Einnig spilaði Waters nýlegt lag frá sólóferli sínum, Leaving Beirut, þar sem hann gagnrýndi harðlega stríðsreksturinn í Írak og skaut föstum skotum að Tony Blair og George W. Bush. Uppi á risastóru breiðtjaldi sýndi Waters síðan á skemmtilegan hátt smásögu sína í teiknimyndaformi sem textinn er byggður á.

Breiðtjaldið kom vel út á tónleikunum og smellpassaði við tónlistina. Einnig voru hinar ýmsu raddir af plötunni látnar hljóma vítt og breitt um salinn í hátalarakerfinu á áhrifaríkan hátt. Að auki kom það gríðarvel út þegar geimfari sveif í lausu lofti um salinn undir ómþýðum tónum Waters og félaga. Sannarlega óvænt sýning. Eldglæringar og sprengingar komu einnig við sögu og áttu sinn þátt í að gera þessa tónleika að mögnuðu sjónarspili, fyrir utan konfektið sem þeir voru fyrir eyrun.

Waters sjálfur plokkaði bassann af miklum þrótti á tónleikunum og söng af og til. Stundum gekk hann um sviðið og reyndi að ná til áhorfenda en hann hefði alveg mátt fá þá betur með sér í söng eða klappi. Hefðu þeir auðveldlega getað tekið yfir höllina í lagi á borð við Another Brick in the Wall. Engu að síður fínir tónleikar sem verða lengi í minnum hafðir.

Freyr Bjarnason