Eminem í vestra?

Bandaríski rapparinn Eminem mun hugsanlega taka að sér hlutverk í vestranum Have Gun, Will Travel.

Myndin er byggð á sjónvarpsþáttaröð frá sjötta áratugnum um byssubófa sem hægt er að leigja til hinna ýmsu verka. Svo getur farið að myndin verði tekin upp í heimabæ Eminems, Detroit og einnig eru taldar líkur á að rapparinn semji tónlistina fyrir myndina. Eminem lék í sinni fyrstu mynd, 8 Mile, árið 2002 við mjög góðar undirtektir. Var myndin að hluta til byggð á ævi hans. Rapparinn samdi tónlistina við myndina og sló lagið Loose Yourself rækilega í gegn.

Lítið hefur heyrst frá Eminem að undanförnu en fyrir nokkru kom út safnplata með öllum hans bestu lögum.