Gárur á vegg

Ljósmyndasafn Reykjavíkur opnar sýningu á ljósmyndum Vigfúsar Birgissonar í Skotinu á fimmtudaginn kl.16. Ljósmyndunum, sem sýna yfirborð sjávar, verður varpað úr skjávarpa á 150x190 cm stóran vegg.

Myndirnar sýna ótal litbrigði hins bláa og í einu flæði fléttast saman bárur og gárur hafsins. Vigfús er fæddur árið 1967 í Borgarnesi. Hann fékk snemma áhuga á ljósmyndun og eyddi hann ófáum stundum í myrkraherberginu á sínum menntaskólaárum. Hann hélt síðan til Berlínar í ljósmyndanám árið 1990 og lauk þar námi frá Lette Verein-skólanum. Hann hefur starfað sem sjálfstæður ljósmyndari síðan 1995. Sýning Vigfúsar stendur til 2. ágúst.