Skorað á ráðherra og fjárlaganefnd

Áskorun til fjárlaganefndar Alþingis og menntamálaráðherra var undirrituð á málþingi um framtíð Héraðsskólahússins á Laugarvatni í gær. Þar er skorað á ráðherra og nefndina að beita sér fyrir að á fjárlögum verði eyrnamerktir fjármunir til endurbóta á húsnæði Héraðsskólans. Jafnframt var ákveðið að stofna félag í þeim tilgangi að hrinda hugmyndum um alþjóðlega listamiðstöð á Laugarvatni í framkvæmd. Málþingið var liður í dagskrá Gullkistunnar, listahátíðar á Laugarvatni, sem nú stendur yfir og lýkur um næstkomandi helgi. Héraðsskólahúsið er í umsjá Menntaskólans að Laugarvatni. Halldór Páll Halldórsson, skólameistari Menntaskólans að Laugarvatni, setti málþingið og gerði grein fyrir núverandi notkun á húsnæðinu og þeim aðgerðum sem gripið hefur verið til á undanförnum árum til þess að forða húsnæðinu frá frekari skemmdum, en það er mjög illa farið. Fram kom í máli Halldórs að mikill almennur áhugi væri fyrir að fá húsnæðinu verðugt hlutverk, jafnt meðal heimamanna sem og fulltrúa ríkisvaldsins, en margir fundir hafa verið haldnir í þeim tilgangi á undanförnum árum. Í framhaldi af því röktu Eyrún Ingadóttir sagnfræðingur og Pétur Ármannsson arkitekt sögu skólans í menningar- og byggingarsögulegu samhengi. Fram kom í erindi Eyrúnar og vakti athygli að aðalhvatamaður að stofnun héraðsskólans, Jónas frá Hriflu, hafði m.a. ætlað skólahúsnæðinu að vera eins konar hvíldarmiðstöð fyrir listamenn á sumrin. Mátti þannig heyra samhljóm með fyrstu hugmyndum um notkun húsnæðisins og nýjum hugmyndum um að stofna þar alþjóðlega listamiðstöð. Aðrir frummælendur voru listamennirnir Egill Heiðar Anton Pálsson leikstjóri, Elísabet Jökulsdóttir rithöfundur, Harpa Björnsdóttir myndlistarmaður og Þorvaldur Þorsteinsson myndlistarmaður og rithöfundur.