Þriðji ferðamaðurinn út í geim

Það er að fá alveg nýja merkingu að segjast ætla að "skreppa í sólina". Þriðji geimferðamaðurinn leggur af stað í ferð til alþjóðlegu geimstöðvarinnar 1. október. Bandaríski vísindamaðurinn Gregory Olsen greiðir jafnvirði þrettán hundruð milljóna króna fyrir farmiðann - báðar leiðir auðvitað. Olsen varð ríkur maður á uppfinningum á sviði sjóntækja. Hann er með háskólagráður í eðlis- og efnisfræðum og hefur lengi langað út í geim. Hann samdi við rússnesku geimferðatofnunina og verður farþegi í Soyuz-geimflaug sem skotið verður á loft frá Kasakstan. Tveir geimfarar fara með honum, einn Rússi og einn Bandaríkjamaður. Olsen verður einu viku í stöðinni, sem er á sporbaug um jörðu í um 400 kílómetra hæð og kemur svo aftur til Jarðar með áhöfninni sem dvelur þar nú. Olsen segist ekki telja að hann sé að taka nokkra áhættu svo heitið geti. Soyuz sé þekkt fyrir öryggi og áreiðanleika. Hann kvíði engu heldur bíði óþreyjufullur eftir ferðinni.  Olsen er þriðji ferðamaðurinn til að kaupa sér ferð út í geim. Milljarðamæringurinn Dennis Tito fór í svipaða ferð árið 2001 og Suður-Afríkumaðurinn Mark Shuttleworth fór ári síðar.