Landvinnslu hætt á Stöðvarfirði

"Við reynum að vinna í samstarfi við önnur sjávarútvegsfyrirtæki í bænum og á svæðunum í kring til að flestir fái önnur störf," segir Gestur Geirsson, framkvæmdastjóri landvinnslu Samherja. Ákveðið hefur verið að hætta allri vinnslu í frystihúsi félagsins á Stöðvarfirði í september komandi og verður öllum 32 starfsmönnum sagt upp störfum frá og með þeim tíma. Nokkrir mánuðir eru síðan Samherji ákvað að sameina landvinnslur fyrirtækisins á Stöðvarfirði og á Dalvík og hefur síðan verið unnið að því að draga úr áhrifum uppsagnanna í samvinnu við verkalýðsfélögin og sveitarfélagið. Gestur segir að þegar ákvörðunin um lokun frystihússins hafi verið tekin hafi mið verið tekið af opnun Fáskrúðsfjarðarganga sem flestir telja að muni stórbæta atvinnumöguleika á svæðinu. Verði tafir á opnun ganganna mun Samherji greiða öllum starfsmönnum laun fram að þeim tíma.