Bíladellukarl í forstjórastól

"Ég er mikill bíladellukarl og hef alltaf verið," segir Knútur G. Hauksson, fráfarandi forstjóri Samskipa og verðandi forstjóri Heklu, en fyrir honum verður það líkt og að vinna í dótakassa. Fyrir stuttu var komið á tal við Knút og honum boðið að ganga í eigendahóp Heklu og taka þar yfir sem forstjóri. "Af hverju ekki að slá til," segir Knútur glaðlega og hlakkar greinilega til að takast á við nýtt verkefni, sem er Knúti þó ekki með öllu ókunnugt enda starfaði hann við bílasölu með háskólanámi sínu. Hann segist þó munu sakna Samskipa, enda búinn að vera skemmtilegur tími að hans sögn. "Þegar ég kom þangað árið 2000 var velta fyrirtækisins ellefu milljarðar. Hún verður að minnsta kosti 45 milljarðar á þessu ári," segir Knútur, stoltur af uppbyggingu innanlandskerfisins, vörumiðstöðvarinnar og því að skipum fyrirtækisins fjölgaði úr tveimur í fjögur. Ótrúlega margt hafi gerst síðustu ár og hann hafi unnið með frábæru fólki. "Auðvitað mun maður sakna alls þessa, en ég á ekki von á öðru en að það sé líka frábært fólk hjá Heklu," segir Knútur sem ætlar að taka fyrstu mánuðina í það að prófa sem flesta bíla sem Hekla hefur upp á að bjóða. Knútur hefur keyrt jeppa síðustu fimmtán árin en segist þó alltaf hafa verið "svag" fyrir sportbílum. Þeir hafi þó ekki hentað fjölskyldumanni. Nú þegar börnin eru vaxin úr grasi getur Knútur þó vel hugsað sér að keyra um á einum slíkum. Knútur boðar engar róttækar breytingar í rekstri fyrirtækisins, enda brenni engir eldar. "Auðvitað ætla ég að setja mark mitt á þetta fyrirtæki þegar fram líða stundir," segir hann og er feginn að þurfa ekki að ferðast jafn mikið og hann þurfti í sínu fyrra starfi.