Miðasalan á Airwaves komin í gang

Miðasala á tónlistarhátíðina Iceland Airwaves 2005 hófst á mánudaginn en hátíðin fer fram í sjöunda sinn helgina 19.-23. október og eins og undanfarin ár eru tónleikastaðirnir allir í miðborg Reykjavíkur. Loftkastalinn er nýr tónleikastaður í dagskrá hátíðarinnar í ár og mun litli og stóri salur hans ásamt Nasa, Gauknum, Grand rokk og Pravda verða aðal tónleikastaðir Iceland Airwaves 2005. Í fyrra var uppselt á Airwaves í fyrsta sinn og Hr. Örlygur, skipuleggjandi hátíðarinnar, hvetur því fólk til að tryggja sér miða í tíma. Einungis 3.000 miðar verða til sölu á hátíðina hérlendis. Miðasala Iceland Airwaves 2005 fer fram í verslunum Skífunar (Laugavegi, Kringlunni og Smáralind) og á Midi.is. Miðaverð er 5.700 krónur auk miðagjalds söluaðila. Meðal þeirra 130 listamanna sem koma fram á Iceland Airwaves 2005 eru Annie, Apparat Organ Quartet, Architechture in Helsinki, Babyshambels, The Fiery Furnaces, Ghostigital, Gus Gus, Juliette & The Licks, Junior Senior, Hjálmar, The (International) Noise Conspiracy, Jagúar, Mínus, The Mitchell Brothers, Singapore Sling, Without Gravity og The Zutons. Bandaríska raftónlistar dúóið Ratatat frá New York hefur nú bæst við dagskrá Iceland Airwaves en óhætt er að segja að hér sé á ferðinni eitt af mest spennandi erlendum heimsóknum á Airwaves í ár. Ratatat gaf út sína fyrstu breiðskífu í fyrra og fékk mikið lof fyrir. Þeir hafa túrað með ekki ómerkari listamönnum en Franz Ferdinand, !!!, Tortoise og Interpol og endurhljóðblandað lög með Method Man og Missy Elliot. Tónleikar þeirra í Reykjavík eru einu tónleikarnir sem þeir hafa skipulagt í haust. Aðrir sem nú bætast við dagskrá Iceland Airwaves 2005 eru Ensími, Dr. Spock, Exos, Cell 7, Bent & 7Berg, The Telephthetics, Dóri DNA, Intact, hellvar, Spaceman, We Painted the Walls og Bryndís. Allar frekari upplýsingar um Iceland Airwaves og þá listamenn sem koma fram á hátíðinni má nálgast á www.icelandairwaves.com