Segir sameiningu raunhæfa

Sameina á sveitarfélögin sjö á höfuðborgarsvæðinu, það er bæði raunhæft og skynsamlegt að mati Ólafs F. Magnússonar borgarfulltrúa. Hann ætlar að flytja tillögu þess efnis í borgarstjórn í haust. Sveitarfélögin sem um ræðir eru Reykjavík, Seltjarnarnes, Mosfellsbær, Kópavogur, Garðabær, Álftanes og Hafnarfjörður. Ólafur vekur athygli á þessu í tengslum við eyjabyggðahugmyndir Sjálfstæðisflokksins í Reykjavík. Hann segir að ef höfuðborgarsvæðið verði skipulagt sem heild verði engin umtalsverð landþrengsli til staðar og þá þurfi ekki að ráðast í jafnörvæntingarfullt útspil og Sjálfstæðisflokkurinn hafi lagt fram. Það sé alltof dýrt og umferðarlega óleysanlegt að setja 20 þúsund manna byggð fyrir vestan núverandi byggð á höfuðborgarsvæðinu. Ólafur segir þetta í anda þess sem sveitarfélög sem búi við landþrengsli hafi gripið til, eins og Seltjarnarnes og Kópavogur. Þau ætli að skipuleggja svæði sem alls ekki megi leggja undir byggð og séu sameiginleg útivistarsvæði alls höfuðborgarsvæðisins. Ólafur segist vonast til að menn beri gæfu til að gæta að heildarhagsmununum og hafa framtíðarsýn. Hann segir þessa hugmynd sína raunhæfa. Hún sé hin eina rétta framtíðarsýn fyrir skipulagsmál á höfuðborgarsvæðinu og ef sveitarstjórnarmenn beri ekki gæfu til þess að breyta á þennan veg fyrir hönd umbjóðenda sinna verði Alþingi að taka af skarið og klára þetta mál á allra næstu árum. Ólafur er ekki viss um nægilegur vilji sé innan sveitarfélaganna á höfuðborgarsvæðinu að sameinast, þar vilji menn halda sínum smákóngavöldum. Hann segir að ef takist að koma í veg fyrir dýrkeypt mistök eins og víða séu í burðarliðnum megi með sameiningu spara mikið. Hann segir til dæmis eyjabyggðahugmynd Sjálfstæðisflokksins í Reykjavík fallega á pappírunum en við nánari athugun sé hún ómöguleg með tilliti til umferðar og fleira. Hann bendir til dæmis á að bara landfyllingin vegna eyjabyggðar myndi kosta um 20 milljarða króna sem gerir um milljón á hvern íbúa. Og Ólafur ætlar að ýta sameiningunni af stað. Hann segist heldur búast við því að hann flytji tillögu í borgarstjórn í haust að Reykjavíkurborg hafi frumkvæði að því að óska eftir viðræðum við hin sveitarfélögin um þessi mál. Þetta sé á stefnuskrá frjálslyndra og þeir muni reyna að fylgja eftir sinni stefnu á þessu kjörtímabili.