Erilsamt hjá björgunarsveitum

Umhleypingasamt var víða á suðvesturhorni landsins í gær og fengu lögregla og björgunarsveitir ærin starfa við að bjarga lausum hlutum í verstu hviðunum. Mikill vindstrengur var fyrir Hafnarfjall í Borgarfirði með þeim afleiðingum að þrír bílar með hjólhýsi og einn með tjaldvagn í eftirdragi fuku útaf. Eitt hjólhýsið gjöreyðilagðist. Fór vindhraði yfir 30 metra á sekúndu þegar mest lét á nokkrum stöðum en þrátt fyrir smávægilegt tjón víða bárust engar tilkynningar um slys á fólki. Björgunarsveitarmenn voru kallaðir út á svæðum allt frá Vestmannaeyjum í suðri til Borgarness í vestri. Aðstoðu þeir við að festa lausa muni á byggingasvæðum víða auk þess sem gæta þurfti að bátum í höfnum landsins. Veðurstofa Íslands segir lægðina sem þessu olli á leið yfir landið en dregið hefur úr vindstyrk hennar. Er það ekki óvanalegt að slíkar lægðir fari yfir landið í ágúst og september en ekkert þessu líkt er þó framundan samkvæmt spám. Suðlægar áttir munu ríkja næstu daga með fremur stilltu veðri og vætu annars lagið.