Verkamaður í víngarði Drottins

Trúin er sterkur þráður í öllu sem snertir líf kaupmannsins í Litla húsinu. Hann er yngstur fjögurra systkina en foreldrar hans, Þórunn Jónsdóttir og Guðmundur Jónasson, voru bæði sterktrúuð. Hann fór ungur í sunnudagaskóla í kristniboðshúsinu Zíon á Akureyri og um átta ára aldur byrjaði hann í KFUM þar sem hann varð síðar foringi. Árið 1971 hóf Jón Oddgeir að starfrækja Orð dagsins, símsvara sem fólk gat hringt í allan sólarhringinn og hlustað á kristilegar hugleiðingar. Í dag, 33 árum síðar, starfrækir hann enn Orð dagsins og aldrei hefur hann tekið krónu af þeim sem nýtt hafa sér þessa þjónustu. "Fyrstu áratugina voru mjög margir sem hringdu í Orð dagsins en hin síðari ár hefur þeim farið fækkandi. Þó hringja enn 10 til 20 manns á dag," segir Jón Oddgeir sem les að mestu sjálfur inn á símsvarann og skiptir daglega um hugleiðingar. Þar sem hann fékk engar tekjur af Orði dagsins, en hafði af töluverð útgjöld, fór hann fljótlega að huga að leið til að standa straum af kostnaðinum. "Ég datt niður á breska hugmynd árið 1972 sem gekk út á að bænir voru prentaðar á límmiða sem síðan voru límdir á mælaborð í bílum. Þessari hugmynd kom ég á markað hér á landi og hefur bílabænin farið í tugi þúsunda íslenskra bifreiða." Jón Oddgeir hefur sótt fleiri kristilegar viðskiptahugmyndir út fyrir landsteinana. "Árið 1984 byrjaði ég að gefa út Guðsorðaöskjuna en í henni eru lítil spjöld með 200 ritningargreinum eða Biblíutextum. Öskjuna, sem er að norskri fyrirmynd, kalla ég Orð Guðs til þín úr Biblíunni og hef ég selt yfir 12 þúsund eintök." Litla húsið Jón Oddgeir erfði Litla húsið eftir föður sinn og hóf að versla með kristilegar vörur árið 1981. "Það sem ég sel mest af eru bænabækur, Biblíur handa börnum, krossar af ýmsum toga og Guðsorðaöskjurnar. Einnig eru englanælur og englamyndir vinsælar. Ég hef lítið auglýst í gegnum tíðina en þó hafa viðskiptin heldur farið vaxandi og ég verð ekki var við að fólk sé síður trúað í dag en þegar ég byrjaði fyrir rúmum tveimur áratugum," segir Jón Oddgeir. Kaupmaðurinn í Litla húsinu á Akureyri er einhleypur og óhætt að segja að allt hans líf snúist á einn eða annan hátt um Guð, kirkjuna og trúna. Hann er formaður KFUM og K á Akureyri, á sæti í sóknarnefnd Akureyrarkirkju, situr í stjórn Landssambands KFUM og K, er í leikmannaráði þjóðkirkjunnar, formaður sumarbúðanna að Hólavatni og sem umboðsmaður Hjálparstarfs kirkjunnar á Akureyri sér hann um ýmis verk s.s. að deila út mat til bágstaddra fyrir jól. Að fenginni þessari upptalningu frá Jóni Oddgeiri stenst blaðamaður ekki mátið og spyr hvort ekki sé óhætt að telja hann umboðsmann Guðs á Akureyri. Hann hlær við og strýkur blaðamanni vinalega um bakið um leið og hann segir: "Nei, ég er bara verkamaður í víngarði Drottins!"