Milljónir horfðu á Örninn

Um 4,5 milljónir Þjóðverja horfðu á fyrsta þátt dönsk-íslensku spennuþáttaraðarinnar Örninn, eða Ørnen eins og hann heitir á frummálinu, á mánudaginn var þegar hann var sýndur á þýsku sjónvarpsstöðinni ZDF. Það þýðir að um 18% Þjóðverja hafi horft á þáttinn. Elva Ósk Ólafsdóttir fer með eitt af aðalhlutverkum þáttarins en Benedikt Erlingssyni bregður þar einnig fyrir. Að sögn Michale Bille Frandsen, framleiðanda þáttarins hjá Danska ríkissjónvarpinu, fóru viðtökurnar í Þýskalandi fram úr björtustu vonum. "Þjóðverjarnir höfðu búist við 11 til 14% áhorfi sem er einni milljón minna en horfði á hann," sagði Michale Bille í samtali við Fréttablaðið í gær. "Við erum að sjálfsögðu afar ánægðir með viðtökurnar og sömu sögu er að segja af Þjóðverjunum. Þeir eru búnir að kaupa átta fyrstu þættina og vilja nú kaupa næstu átta." Þættirnir verða meðal annars sýndir hér á landi, í Noregi og Svíþjóð. Þá standa yfir viðræður við franska sjónvarpsstöð. Að sögn Michael Bille er búið að taka upp tólf þætti en seinni hlutinn af seríunni verður tekinn upp á þessu ári. "Við byrjum aftur að taka upp á mánudaginn og ætlum að klára tólf síðustu þættina. Síðasti þátturinn verður tekinn upp á Íslandi," segir Michael Bille sem vill þó ekki gefa upp hvar hann verður tekinn. Örninn fékk einnig góðar viðtökur í Danmörku en um 70% Dana sáu fyrsta þáttinn. "Þátturinn var á toppnum yfir áhorf fyrstu átta vikurnar," segir Michael Bille. Þættirnir fjalla um Hallgrím Örn Hallgrímsson, uppalinn Vestmannaeying, sem á danskan föður. Hallgrímur flutti ungur til Danmerkur og starfar sem rannsóknarlögreglumaður í Kaupmannahöfn. Danski leikarinn Jens Albinus fer með hlutverk Hallgríms en Elva Ósk með hlutverk systur hans. Leikstjóri er Jørgen Ramsko. Fyrsta þátturinn af Erninum verður sýndur í sjónvarpinu í lok febrúar.