CIA hafi hugsanlega flogið með fanga um íslenska lofthelgi

Hugsanlegt er að bandaríska leyniþjónustan hafi flogið um íslenska lofthelgi með grunaða hryðjuverkamenn. Allt bendir til að slík vél hafi lent í Keflavík.

Danski þingmaðurinn Frank Aaen spurði Flemming Hansen, samgönguráðherra Danmerkur, um það hvort vélar á vegum CIA, sem hafi verið að flytja grunaða hryðjuvekramenn um heiminn hafi lent í Kaupmannahöfn.

Samkvæmt dönskum fjölmiðlum lenti slík vél í Kaupmannahöfn í mars. Hún hafi síðan farið þaðan 7. mars klukkan 8 um morguninn og tekið stefnuna á Kelfavík. Þá eru fregnir um það að vélar af þessu tagi hafi verið nokkuð tíðar í danskri lofthelgi frá árinu 2001.

Samkvæmt heimildum Stöðvar 2 er það algengara en fólk almennt heldur að slíkar vélar séu á ferð um heiminn og að þær hafi viðkomu hér eins og víðar. Oft er verið að flytja fangana á staði þar sem pyntingar eru leyfðar. Þá kemur það einnig fram í norskum fjölmiðlum að vélar á leið til og frá Guantanmo-fangabúðunum á Kúbu hafi verið í Noregi.

Flugvallarstjórinn í Stavangri staðfesti í samtali við dagblað í Noregi að CIA-vél á leið frá Rúmeníu hefði farið frá Stavangri til Keflavíkur fyrr á árinu.