Eyjamenn hafa tapað milljarði

Þegar dagbátar voru settir undir krókaaflamark og Alþingi samþykkti línuívilnun voru aflaheimildir að andvirði um eins milljarðs króna færðar með handafli frá Vestmannaeyjum. Sindri Viðarsson útskriftarnemi bendir á þetta í lokaritgerð sinni frá sjávarútvegsdeild Háskólans á Akureyri. Hann staðhæfir einnig að veiðigjaldið hafi kostað sjávarútveg umtalsverðar upphæðir. Magnús Kristinsson útgerðarmaður í fyrirtækinu Bergur-Huginn ehf. í Vestmannaeyjum segist sjálfur hafa glatað rúmlega 100 þorskígildistonnum vegna þessara tilfærslna ríkisstjórnarinnar. "Það er endalaust verið að færa frá einum til annars og ég get ekkert borið hönd fyrir höfuð mér í þessu máli. Þetta er einhver pólitískur skollaleikur um línuívilnun og að krókaaflamarksbátar fái þetta og hitt og við alltaf látnir blæða þó maður sé búinn að fjárfesta í kvóta fyrir nokkra milljarða", segir Magnús. Magnús segir sína útgerð tapa tugum milljóna ár hvert vegna aðgerðanna. Árni Mathiesen sjávarútvegsráðherra segir veiðigjaldið auðvitað koma til með að kosta útgerðarmenn meira þegar það verður að fullu komið í framkvæmd en verði þó afkomutengt fyrir útgerðina. Árni vill ekki meina að Vestmannaeyingar hafi tapað á krókaaflamarki vegna þess að fiskaflahámarksbátar hafi nú frjálsa sókn í svokallaðar aukategundir. Hann bendir einnig á að þegar breytingin var gerð þá hafi kvótinn verið aukinn, "þó Vestmannaeyingar hafi fengið lægri prósentu þá fengu þeir samt enn sama magnið", segir Árni. "Þegar til lengri tíma er litið og framtíðarviðgangs fiskistofnsins þá skiptir engu máli hvort fiskurinn er veiddur innan aflamarks eða frjálsri veiði, hann er jafn dauður fyrir það. Það var einungis verið að færa þennan hóp inn í aflamarkið til að ná betri stjórn á veiðunum og það tókst svo vel að nú er staðan sú að aflamark í ýsu hefur aldrei verið meira og það er Vestmannaeyingum til góðs", segir Árni. Árni viðurkennir að vegna eðli útgerðar í Vestmannaeyjum þá hafi línuívilnunin valdið því að þar sé minna veitt.