Bandarísk stjórnvöld viðurkenna að hafa í haldi fanga sem mannréttindasamtök hafa ekki aðgang að

Bandarísk stjórnvöld hafa viðurkennt að þau haldi föngum sem mannréttindasamtök fá ekki aðgang að. Rauði Krossinn fær ekki aðgang að öllum föngum sem Bandaríkjamenn hafa í haldi. Þetta viðurkenndu stjórnvöld í Washington í fyrsta skipti í gær. Aðal lögfræðingur utanríkisráðuneytisins sagði í gær að Rauði Krossinn hefði aðgang að öllum í Guantanamo á Kúbu, en þegar hann var spurður hvort samtökin hefðu aðgang að öllum föngum sem væri haldið við svipaðar aðstæður annars staðar, svaraði hann því neitandi. Hann neitaði að skýra málið frekar og vildi ekki gefa uppi á hvaða stöðum föngum væri haldið án þess að mannréttindasamtök fengju að þeim aðgang. Þetta er í fyrsta skipti sem stjórnvöld í Washington viðurkenna beinlínis að föngum sé haldið á leynilegum stöðum. Talsmaður Rauða Krossins segir að samtökin komi til með að krefjast þess að fá aðgang að föngunum sem um ræðir.