Bók um Thorsara fargað

Heilu upplagi af nýrri bók Guðmundar Magnússonar, sagnfræðings og blaðamanns, um Thorsættina var fargað og annað handrit prentað í staðinn. Samkvæmt heimildum NFS var ástæða förgunarinnar umfjöllun um nasistaleiðtogann George Rockwell og hjónaband hans og Þóru Hallgrímsson. Útgefandi segir að mistök hafi átt sér stað. Hann vill þó ekki svara því hvort umfjöllunin sé ástæða förgunarinnar

Í fyrstu útgáfu bókarinnar var kafli þar sem sagt frá hjónabandi Þóru Hallgrímsson og stofnanda Nasistaflokks í Bandaríkjunum, sem áður var yfirmaður Keflavíkurflugvallar. Kaflinn fór eitthvað fyrir brjóstið á útgefandanum en eigandi Eddu, útgáfunnar sem gefur bókina út er einmitt Björgólfur Guðmundsson, eiginmaður Þóru Hallgrímsson.

Upplaginu var fargað og bókin prentuð á nýjan leik án kaflans um fyrrum eiginmann Þóru.

George Lincoln Rockwell, fyrrum eiginmaður hennar, var myrtur í apríl 1967 af fyrrum liðsmanni í Bandarísku Nasistahreyfingunni. Morðinginn, John nokkur Patler, hafði þá stuttu áður verið rekinn úr félagsskap Rockwell og nasista fyrir meinta Bolsévíska slagsíðu sem þótti ekki henta málstað nasista.

Í þeirri útgáfu bókar Guðmundar sem nú er núkominn í búðir er einungis einu sinni minnnst á George Rockwell, og þá sem annan eiginmann Þóru.

Páll Bragi Kristjónsson, útgafústjóri Eddu útgáfu, staðfesti í samtali við NFS að fyrri prentun bókarinnar hefði verið fargað, eins og hann orðaði það. Þegar hann var spurður að því hvort upplaginu hefði verið fargað vegna umfjöllunar um hjónaband Þóru og George Rockwell, kvaðst hann ekki vilja svara þeirri spurningu. Bragi sagði það hafa verið samkomulag útgáfunnar og höfundar að prenta bókina upp á nýtt.