Kennsla í listdansi einkavædd

Kennsla í listdansi verður einkavædd í haust ef áætlanir menntamálaráðuneytisins ganga eftir. Viljayfirlýsing á milli Menntaskólans í Hamrahlíð og forsvarsmanna nýs listdansskóla um greiðslu fyrir danskennslu verður undirrituð í dag.

Fulltrúar menntamálaráðuneytisins funduðu í gær með starfsmönnum Listdansskóla Íslands, en eins og greint hefur verið frá stendur til að leggja hann niður í vor. Fram kom á fundinum að ráðuneytið hygðist semja við tvo kennara við skólann, þær Ástrós Gunnarsdóttur og Lauren Hauser, sem hafa stofnað fyrirtæki, Dansmennt, sem á að reka skóla sem leysir Listdansskólann af hólmi. Skólinn á að vinna samkvæmt nýrri námsskrá um listdanskennslu sem verið er að leggja lokahönd á og að þremur árum liðnum verður samningurinn endurskoðaður.

Örn Guðmundsson, skólameistari Listdansskóla Íslands, segir að yfirlýsingin sem undirrituð verði í dag sé á milli Dansmenntar og Menntaskólans í Hamrahlíð þannig að MH kaupi þjónustuna af skólanum.

Hugsanlegt er að fleiri framhaldsskólar geri samning við hinn nýja skóla en það er ekki ljóst á þessari stundu. Kennsla í grunnskóladeild verður einnig í hinum nýja skóla en eftir því sem fréttastofa kemst næst hefur enginn samningur verið gerður á milli sveitarfélaga og hins nýja skóla um kennslu í listdansi.

Ástrós Gunnarsdóttir vildi lítið tjá sig um málið þegar eftir því var leitað og vísaði til viljayfirlýsingarinnar sem undirrituð verður í dag. Hún sagði þó að verið væri að vinna að skipulagi skólans með fram nýju námsskránni. Ástrós sagði ekki ljóst hvort og þá hve há skólagjöld yrðu innheimt fyrir námið.

Þeir starfsmenn Listdansskóla Íslands sem fréttastofa ræddi við eru mjög uggandi vegna ástandsins enda verða þeir atvinnulausir frá og með vorinu og ekki er ljóst hversu margir verða ráðnir til hins nýja skóla. Þá hafa þeir efasemdir um að námið beri sig verði það einkavætt. Það hefur Örn, skólameistari Listdansskólans, líka. Hann segir einkavæðingu ekki góða lausn fyrir listkennslu, hvorki á Íslandi né annars staðar því námið sé sérhæft og markvisst til þess að það beri árangur.

Leitað var eftir viðbrögðum menntamálaráðuneytisins en þau fengust ekki.