Yfir 60 látnir eftir sprengjuárásina

Nú er ljóst að yfir 60 manns létust og meira en 200 eru særðir eftir röð sprenginga í Nýju-Delí, höfuðborg Indlands, á laugardaginn. Allar sprengjurnar sprungu á vinsælum markaðstorgum en samtökin Lashkar-e-Tayyaba hafa lýst verknaðinum á hendur sér.

Sprengingarnar urðu í upphafi trúarhátíða hindúa og múslíma. Yfirvöld segja samtökin tengd Kashmiri-samtökunum, sem eru andvíg friðarviðræðum við Pakistana. Forsætisráðherra Indlands sagði um helgina rannsókn málsins ganga vel og lofaði árangri en í mótmælagöngu sem farin var í gær krafðist indverskur almenningur þess að glæpamennirnir yrðu hengdir. Þá hefur forsætisráðherra Pakistana fordæmt árásirnar.

Friðarviðræður milli þjóðanna tveggja hafa gengið ágætlega og hefur samkomulag um að landamærin við Kasmír verði opnuð á fimm stöðum meðal annars náðst, en tilgangurinn er að auðvelda hjálparstarfið eftir jarðskjálftana fyrir skemmstu og að stíga skref í sáttaátt. Friðarumleitanir milli Indverja og Pakistana voru komnar vel á veg þegar þremur sprengjum var varpað á markaðssvæði í Delí og óttast nú yfirvöld beggja ríkja að friðarferlið sé á enda.