Stúdentar afhenda ráðherra ályktun

Stjórn Stúdentaráðs Háskóla Íslands harmar ályktun landsfundar Sjálfstæðisflokksins um að taka beri upp skólagjöld við opinbera háskóla. Stúdentar ætla að afhenda menntamálaráðherra og formanni menntamálanefndar Alþingis ályktun þessa efnis í dag. Í ályktun Stúdentaráðs segir að stjórn ráðsins líti ályktun sjálfstæðismanna alvarlegum augum í ljósi þess að Sjálfstæðisflokkurinn fari með ráðuneyti menntamála auk formennsku í menntamálanefnd Alþingis. Þá er áréttuð sú afstaða Stúdentaráðs að það telji með öllu ótækt að tekin verði upp skólagjöld við Háskóla Íslands og að upptaka skólagjalda myndi skerða jafnrétti til náms við skólann sem víðtæk sátt hefur ríkt um að sé öllum landsmönnum opin. Stúdentaráð óskar þá einnig eftir stuðningi alls þjóðfélagsins í ályktun sinni og þá sérstaklega eftir stuðningi Framsóknarflokksins sem ályktaði á flokksþingi síðastliðinn vetur gegn skólagjöldum við opinbera háskóla. Svo virðist sem stjórnarflokkarnir séu á öndverðum meiði í þessu máli, sem og í málefnum Landsvirkjunar, sem Sjálfstæðisflokkurinn vill einkavæða en ekki Framsóknarflokkurinn.