Vatnstjón á tuttugu húsum

Um tuttugu hús urðu fyrir vatnstjóni á Höfn í Hornafirði um helgina eftir einhverja mestu úrkomu á svæðinu í manna minnum. Enn er verið að meta skemmdir. Vatnsflóðið á Höfn sjatnaði töluvert eftir að dró úr úrkomunni. Víða blasir þó við tjón á húsum og vinna við hreinsun og viðgerðir. Ekki er ljóst hvert endanlegt tjón er, en samkvæmt bæjarverkfræðingi er enn verið að meta það. Mikið vatn flæddi inn í kjallarann hjá Ragnhildi Þorsteinsdóttur og þegar mest var náði vatnshæðin um sextíu sentimetrum. Ragnhildur segir að erfitt hafi verið að bjarga ýmsum munum þar sem svo mikið vatn hafi verið í kjallaranum.