Rjúpnaveiði hafin á ný

Rjúpnaveiðimenn taka eflaust gleði sína á ný því í dag hófst rjúpnaveiði eftir tveggja ára veiðibann. Talið er að um þrjú þúsund manns stefni á rjúpnaveiðar á næstunni en veiðitímabilið hefur verið stytt frá því sem það var fyrir veiðibann og lýkur því 15. nóvember. Lögregla um allt land verður með aukið eftirlit vegna veiðanna og verða bílar, þyrlur og flugvélar notaðar við eftirlit með rjúpnaveiðimönnum. Á Miðvesturlandi hafa sýslumannsembættin í Borgarnesi og í Búðardal haft með sér samstarf vegna veiðanna og vekur lögregla á þessum slóðum vekur athygli veiðimanna á því að þriðju leitir fara fram í Suðurdölum í Dalabyggð í dag og sömuleiðis verða leitir hjá Mýramönnum og Borgfirðingum á sama tíma. Leitað verður á vinsælu rjúpnaveiðisvæði og eru veiðimenn beðnir um að sýna tillitssemi og varúð á þessu landsvæði. Töluvert hefur hlýnað á landinu undanfarinn sólarhring og snjó víða tekið upp þannig að rjúpan sem var komin í sín hvítu vetrarklæði á því eflaust erfiðara með að fela sig fyrir veiðimönnunum.  Fréttastofa Stöðvar 2 og Byljunnar náði tali af Ívari Pálssyni, varaformanni Skotveiðifélags Íslands, þar sem hann var við rjúpnaveiðar á Kili. Hann og tveir félagar hans höfðu þegar haft erindi sem erfiði og höfðu þegar veitt sex rjúpur. Ívar sagði veður skaplegt en það hefði reyndar verið slagveður snemma í morgun. Ívar sagðist reikna með að þeir héldu áfram veiðum en ekki yrði veitt of mikið heldur myndu þeir gæta hófs.