Fjárlagafrumvarp fær falleinkunn

Samtök atvinnulífsins og Alþýðusamband Íslands eru sammála um að forsendur kjarasamninga séu brostnar. Framkvæmdastjóri Alþýðusambands Íslands gefur fjárlagafrumvarpinu falleinkunn. Hannes Sigurðsson, aðstoðarframkvæmdastjóri Samtaka atvinnulífsins, hefur áhyggjur af verðbólguspám síðustu daga og segir forsendur kjarasamninga vera brostnar. Hann segir að samkvæmt spánum verði fjögurra prósenta verðabólga ár eftir ár en eins og vitað sé séu verðbólgumarkmið ríkisstjórnarinnar og Seðlabankans 2,5 prósent. Kjarasamningar sem gerðir hafi verið til fjögurra ára byggist á þeirri forsendu að verðbólgan sé í kringum markmiðið. Ef verðbólgan sé fjögur prósent séu samningar í sjálfu sér í uppnámi og taka þurfi þá til endurskoðunar. Hannes segir ekki bara áhyggjuefni núna að verðbólgan sé yfir þeim mörkum sem forsendur kjarasamninga segja til um og bendir á að sama staða eigi eftir að koma upp í nóvember á næsta ári lækki verðbólgan ekki. Hann segist hafa vænst meira aðhalds í fjárlagafrumvarpi ríkisstjórnarinnar. Þar sé að finna viðleitni til aðhalds en það dugi hvergi nærri til. Gylfi Arnbjörnsson, framkvæmdastjóri Alþýðusambands Íslands, er einnig á því að forsendur kjarasamninga séu brostnar. Hann segir fjárlagafrumvarpið ekki hjálpa til við þá vinnu sem fram undan er. Gylfi segir verðbólguna einfaldlega alltof mikla miðað við þær forsendur sem kjarasamningar geri ráð fyrir og verið sé að hefja vinnu við endurskoðun kjarasamninga en henni þurfi að ljúka fyrir 15. nóvember. Fjárlögin sem lögð hafi verið fram á mánudaginn sé ekki til að auðveld vinnuna. Gylfi gefur fjárlagafrumvarpinu falleinkun og segir ógæfumerkjum í efnahagsmálum ekki vera sinnt. Honum sýnist að allir aðilar, ASÍ, Seðlabankinn, Samtök atvinnulífsins, greiningardeildir bankanna, alþjóðastofnanir eins og OECD og Alþjóðabakninn, bendi á að stjórnvöld sinni ekki þeirri skyldu sinni að skapa í gegnum ríkisfjármálin þá festu sem þurfi til né heldur að skapa þann trúverðugleika gagnvart almenningi að hagsmunum hans sé borgið.