Misnotkun á ávanalyfjum vandamál

Misnotkun á ávanabindandi lyfjum er vandamál að sögn aðstoðarlandlæknis. Hann segir að lítið hafi verið fylgst með lyfjanotkun Íslendinga hingað til en vitað er til þess að allt að tíu læknar hafi ávísað ávanabindandi lyfjum til eins og sama aðila. Aðstoðarlandlæknir segir þó að með nýju kerfi sé nú hægt að fylgjast betur með sjúklingum og læknum. Frá síðustu áramótum hefur Landlæknisembættið getað, með nýjum lyfjagagnagrunni, fylgst með öllum þeim lyfseðlum sem skrifað er upp en Matthías Halldórsson aðstoðarlandlæknir segir að verulega hafi komið á óvart hversu mikið magn fólk hafi fengið uppáskrifað af ávanabindandi efnum og hjá hversu mörgum læknum margir eru. Matthías segir að um mikið vandamál hafi verið að ræða. Landlæknisembættinu hafi lengi verið falið að fylgjast með þróun lyfjanotkunar í landinu en það hafi vantað tæki til þess. Hinn nýi lyfjagagnagrunnur sé bráðnauðsynlegt tæki til þess. Matthías tekur það þó fram að ekki sé verið að fylgjast með lyfjanotkun hvers og eins einstaklings heldur þeirra sem fari út yfir öll mörk. Hann segir ástæðu þess að farið var af stað nú þá að dauðsföllum af völdum ofnotkunar á lyfjum hafi fjölgað og að nauðsynlegt sé að hafa gagnagrunn sem fylgist með því hvers konar lyf og í hversu miklu magni fólk fær þau hjá lækni eða læknum. Og tilfellin eru ekki fá. Matthías segir fólk hafa farið til margra lækna í leit að lyfjunum og þá segir hann lækna verða mjög hissa þegar þeir heyri til hversu margra lækna fólk hafi leitað, en þetta hafi oft verið fólk sem hafi alls ekki borið með sér að það væri í lyfjamisnotkun og læknarnir hafi verið í góðri trú þegar þeir hafi gefið fólkinu lyfin.  Matthías segir fólk ekki þurfa að hafa áhyggjur af því að hver sem er komist að þeim gögnum sem Landlæknisembættið býr yfir. Hann einn hafi upplýsingar um læknisferðir og lyfjanotkun fólks. Markmiðið með grunninum sé einfalt, að lyfseðlar séu gefnir út með eðlilegum hætti.