Saka hvorar aðra um svik

Ásakanir um svik og ólýðræðisleg vinnubrögð ganga nú enn og aftur á víxl milli tveggja fylkinga í félagsskap ungra sjálfstæðismanna í Reykjavík, Heimdalli, og er megindeiluefnið nú fundartími og val á honum í tenglsum við val á um 150 fulltrúum Heimdalls á landsfundi ungra sjálfstæðismanna sem haldinn verður 30. september næstkomandi. Ástæða deilnanna er þó ögn einfaldari samkvæmt heimildum fréttastofunnar og á sér upphaf og endi í framboði Bolla og hans hóps fyrir tveimur árum þegar þáverandi stjórn félagsins neitaði að nýskrá hóp fólks sem fylgdi Bolla að málum. Í kjölfarið úrskurðaði fulltrúaráð félagsins að fólkið skyldi fá inni í félaginu og Bolli og hans hópur vann kosningu til formanns og stjórnar ári síðar. Nú er þó sami hópur og laut í lægra haldi fyrir Bolla fyrir ári að saka hann um að beita sömu ólýðræðislegu vinnubrögðunum við val á fulltrúum á landsfund. Davíð Þorláksson, talsmaður þess hóps, sagði í samtali við fréttastofu Bylgjunnar að stjórn Heimdalls undir forystu Bolla hefði á dögunum samþykkt hverjir kæmu til með að sitja fundinn fyrir hönd Heimdalls og þar hafi fjöldi fólks verið, sem nýskráð hefði verið í félagið. Fyrir vikið hefði verið gengið fram hjá fyrrverandi stjórnarmönnum í Heimdalli og eldri félagsmönnum, er nafn Orra Haukssonar, fyrrum aðstoðarmanns Davíðs Oddssonar, nefnt sem dæmi um félaga sem ekki hlutu náð fyrir augum Bolla. Davíð Þorláksson sagði aðspurður um hvort deilurnar nú snerust um smölun vegna framboðs Borgars Þórs Einarssonar til formanns SUS, sem Bolli styður, að ekki væri enn ljóst hvort Borgar fengi mótframboð. Samkvæmt heimildum fréttastofu telja menn líklegt að Pétur Árni Jónsson, fyrrverandi framkvæmdastjóri SUS, muni bjóða sig fram og þá sem fulltrúi andstæðinga Bolla og Borgars innan SUS. Andstæðingar Bolla fóru í gær fram á nýjan fund í Heimdalli um val á fulltrúum á landsfundinn og er hann boðaður í dag klukkan hálffimm. Davíð segir þó tilgangslaust að mæta á mannsöfnuð Bolla í dag, fundurinn sé ólöglegur og annar verði boðaður af hálfu andstæðinga Bolla og þess freistað að að fjölga fulltrúum þess hóps á landsfundinum. Bolli Thoroddsen vísar því á bug í samtali við fréttastofu Bylgjunnar að fundurinn, sem boðaður var í dag, sé ólöglegur enda liggi á að skila inn fulltrúalistum fyrir landsfundinn. Hann vísar því sömuleiðis á bug að hann sé að smala sínu fólki og Borgars á landsfundinn enda hafi 280 manns sóst eftir að fylla 150 sæti Heimdalls á landsfundinum, sem sé met, og því hafi einfaldlega þurft að velja og hafna fólki.