Erfitt verður að mynda stjórn

Yfir 60 milljónir kjósenda höfðu kost á að greiða atkvæði til klukkan sex að staðartíma og metfjöldi nýtti sér það. Fyrstu útgönguspár benda til að niðurstaðan verði önnur en menn bjuggust við og það gæti reynst erfitt að mynda stjórn. Báðir stóru flokkarnir töpuðu töluverðu fylgi. Hjá Jafnaðarmannaflokki Gerhards Schröders var það við búið en ekki var búist við því Kristilegir demókratar, flokkur Angelu Merkel, skyldu tapa fylgi. Samkvæmt nýjustu tölum fá jafnaðarmenn rétt rúlega 34 prósenta fylgi og Kristilegir demókratar aðeins einni prósentu meir. Angela Merkel, sem verður næsti kanslari Þýskalands, birtist á fréttamannafundi eftir að útgönguspár voru birtar og þar sagði hún að miðað við þá vitneskju sem nú lægi fyrir væri ljóst að stjórn jafnaðarmanna og græningja væri fallin. Hún beindi orðum sínum til Schröders og sagði kosningunum lokið. Nú þyrfti fólkið í landinu að fá stöðuga ríkisstjórn. Það væri verkefni sem kristilegir demókratar væru færastir að takast á við. Angela Merkel var ekki kát á svipinn enda var sigurinn ekki stór. Hennar bíður nú það erfiða verkefni að reyna að mynda stjórn. Stóru flokkarnir tveir gætu myndað stjórn en leiðtogar beggja flokka hafa neitað að mynda stjórn saman og raunar hafa leiðtogar hinna ýmsu flokka neitað að mynda alls kyns stjórnir með hinum flokkunum. Sú lausn sem verið er að ræða núna er svokölluð Jamaíkalausn, þ.e. samstarf kristilegra demókrata, frjálslyndra demókrata og græningja.