Ekkert lögbann á bók

Sýslumaðurinn í Reykjavík vísaði í gær frá lögbannsbeiðni sem sett hafði verið fram á útgáfu bókarinnar Fiskisagan flýgur frá bókaútgáfunni Skruddu. Í úrskurðinum er vísað til þess að bókin sé komin út og sá gjörningur verði ekki aftur tekinn. Fyrir helgi lagði sýslumaður til að trygging vegna lögbannsins yrði 1,5 milljónir króna, en útgefandinn fór fram á tryggingu upp á 10 milljónir króna, enda hafi mikill kostnaður verið lagður í útgáfuna, bæði laun og prentun. "Við munum ekki una þessum úrskurði," segir Kristinn H. Benediktsson höfundur ljósmynda í bókinni, en hann vildi fá fram lögbann þar sem hann taldi illa farið með hugverk sín í ritinu. "Það er málshöfðun í undirbúningi, en við bíðum eftir plöggum frá sýslumanni þannig að kæran verður trúlega ekki lögð fram fyrr en á morgun," segir hann.