Verstu óeirðir í áraraðir

Verstu óeirðir í áraraðir brutust út í Belfast á Norður-Írlandi í gær og stóðu fram undir morgun. Að minnsta kosti tugur lögreglumanna særðist þegar mótmælendur köstuðu í þá múrsteinum og heimatilbúnum bensínsprengjum og kveiktu í bílum og byggingum. Ástæða átakanna var sú sama og á hverju ári. Óraníuhreyfingin er ein elsta og öflugasta hreyfing þeirra Norður-Íra sem eru mótmælendatrúar. Á hverju hausti marsera Óraníumenn um götur Belfastborgar. Sérstök bresk göngunefnd var skipuð árið 1997 til að hafa umsjón með göngunum og sjá til þess að leiðin lægi ekki of nærri alkaþólskum hverfum. Þegar lögreglumenn hugðust sjá til þess að Óraníumenn gætu ekki þrammað í gegnum Springfieldhverfið, sem er rammkaþólskt, varð allt vitlaust og átök brutust út. Þau breiddust svo um borgina eins og eldur í sinu og áttu lögreglumenn og hermenn sem kallaðir voru til í mestu vandræðum með að ná stjórn á borginni á ný. Mótmælendur köstuðu heimatilbúnum sprengjum og múrsteinum í þá og til skotbardaga kom á að minnsta kosti einum stað. Tugir bíla voru brenndir og í norðurhluta Belfast var kveikt í byggingum líka. Að minnsta kosti tugur lögregluþjóna er særður en fjöldi slasaðra mótmælenda er ekki kunnur því þeir forðast sjúkrahús eftir átök við lögregluna þar sem innskráning þar gæti leitt til handtöku. Lögreglustjórinn segir mótmælendur bera ábyrgð á því hversu alvarlegt ástandið varð en Óraníumenn saka lögregluna um óþarfa hörku og ofbeldi, en hún sprautaði vatni yfir mótmælendur og skaut á þá með plastkúlum.