Leitaði liðsinnis Landhelgisgæslu

Rússneskur ferjufarþegi bað íslensku Landhelgisgæsluna að bjarga sér þegar þrjótar ógnuðu honum á leið frá Þýskalandi til Finnlands. Verkefni varðstjóra í stjórnstöð Landhelgisgæslunnar geta verið mjög fjölbreytileg eins og menn komust að í nótt. Stjórnstöð Landhelgisgæslunnar fékk aðstoðarbeiðni um 112 neyðarnúmerið frá farþega í ferju sem var á leiðinni frá Rostock í Þýskalandi til Hangö í Finnlandi. Farþeginn sem var rússneskur hafði hringt í 112 og sagðist óttast um líf sitt. Það óvenjulega var að hringingin skyldi lenda á Íslandi en það kemur víst einstaka sinnum fyrir vegna svokallaðrar reikivillu í GSM-kerfinu erlendis að því að talið er. Maðurinn talaði mjög bjagaða ensku og sagðist vera staddur einhvers staðar á 7. eða 8. þilfari um borð í ferjunni en gat ekki sagt nákvæmlega hvar. Samkvæmt Landhelgisgæslunni tókst varðstjórar að fá hann til að gefa upp nafn og símanúmer og hafði síðan samband við björgunarstjórnstöðina í Turku í Finnlandi en þar var gefið samband við björgunarstjórnstöðina í Tallin í Eistlandi þar sem rússneskumælandi menn starfa. Eftir að þeir náðu tali af skipstjóra ferjunnar fór slökkvilið hennar á stúfana að leita að manninum og fann hann heilan á húfi og kom honum í öruggt skjól. Maðurinn hafði lent í útistöðum og slagsmálum við menn sem einnig voru farþegar um borð í ferjunni og taldi þá greinilega líklega til alls. Maðurinn bað fyrir þakklæti fyrir aðstoðina.