Fjórtán börn fórust í brunanum

Sautján afrískir innflytjendur fórust í eldsvoða í hrörlegu fjölbýlishúsi París í fyrrinótt, þar af voru fjórtán börn. Harmleikurinn hefur beint kastljósinu að bágum aðbúnaði innflytjenda í landinu. Eldurinn kom upp í húsi í 13. hverfinu en þar bjuggu afrískir innflytjendur frá Senegal og Malí, hundrað börn og þrjátíu fullorðnir. Talið er að eldurinn hafi kviknað á jarðhæð hússins undir miðnætti og næstu þrjár klukkustundirnar teygðu logarnir sig upp bygginguna svo að íbúarnir, sem flestir voru í fasta svefni, áttu sér enga undankomuleið. Fjórtán börn voru á meðal þeirra sautján sem létust en 23 voru fluttir á sjúkrahús. Serge Blisko, hverfisstjóri, sagði að svo virtist sem flestir hefðu andast í svefni vegna reykeitrunar en slökkviliðsmenn telja að einhverjir hafi látist af sárum sínum. "Ég heyrði börn gráta og fullorðna öskra," sagði Oumar Cisse, íbúi í húsinu, sem komst naumlega úr eldhafinu. "Mörg börn kölluðu í angist sinni á foreldra sína og fólk stökk ofan úr gluggum." Cisse bætti því við að húsið hefði verið í mjög slæmu ásigkomulagi og þar hafi verið krökkt af rottum, músum og öðrum kvikindum. Fólkið hafi beðið eftir betra húsnæði síðan 1991 en ekkert hafi gerst. Eldsupptök eru ókunn og vinnur lögregla að rannsókn á þeim. Þó er talið ólíklegt að rafmagn hafi valdið brunanum. Þetta er í annað sinn á stuttum tíma sem mannskæður eldsvoði kemur upp í híbýlum innflytjenda í París en í apríl fórust 24 þegar hótel brann til kaldra kola. Mikil reiði ríkir í Frakklandi vegna slæms kosts sem Afríkubúar virðast þurfa að sætta sig við. "Í París eru engin hús fyrir barnmargar fjölskyldur," sagði Dogad Dogoui, formaður samtaka afrískra innflytjenda í Frakklandi í samtali við BBC. "Þessi börn eru frönsk börn. Þau eru þeldökk en engu að síður frönsk. Það er á ábyrgð ríkisstjórnarinnar og borgaryfirvalda að finna þeim mannsæmandi bústað." Jacques Chirac Frakklandsforseti lýsti yfir hryggð sinni í yfirlýsingu og Nicolas Sarkozy innanríkisráðherra fór á vettvang og skoðaði verksummerki. Honum var að sögn CNN mjög brugðið.