Lág laun rót vandans

"Það er auðvitað mjög slæmt ef þessi staða kemur ítrekað upp á haustin," segir Elín Thorarensen, framkvæmdastjóri Heimilis og skóla. Mörg hundruð börn bíða þess að fá pláss á frístundaheimilum Reykjavíkurborgar vegna manneklu. "Ég tel stóran hluta af vandanum koma til vegna þess að launin eru mjög lág," segir Elín. "Fólk staldrar þess vegna stutt við í starfi og hleypur af stað um leið og annað býðst." Elín telur að hægt væri að auðvelda mannaráðningar með því að leitast við að byggja upp faglegra starf í frístundaheimilunum, til dæmis með því að ráða meira af fagmenntuðu fólki. "Hér á landi er verið að mennta fólk í tómstundafræðum sem gæti vel sinnt frístundaheimilunum, í samráði við aðrar fagstéttir," segir Elín. "Ég tel hluta af vandanum koma til vegna þess að starfið er ekki byggt nógu markvisst upp til þess að sinna uppeldi."