Sigur vinnist með hugmyndum

Formaður Samtakanna 78 segir að unninn sé fullnaðarsigur í réttindabaráttu homma og lesbía fái hugmyndir félagsmálaráðherra brautargengi innan ríkisstjórnarinnar. Lokið verður við frumvarp til lagabreytinga um þessi efni í stjórnarráðinu á næstu vikum. Í forsætisráðuneytinu er nú unnið að drögum ríkisstjórnarfrumvarps sem fjallar um réttarstöðu samkynhneigðra og ætti þeirri vinnu að ljúka í haust samkvæmt upplýsingum frá ráðuneytinu. Stuðst er við mat nefndar sem komst meðal annars komst að þeirri niðurstöðu að samkynhneigðir ættu að fá að skrá sig í óvígða sambúð og ættleiða íslensk börn. Hún klofnaði hins vegar í afstöðu sinni til þess hvort samkynhneigðir ættu að fá að ættleiða börn frá útlöndum og lesbíur að njóta aðstoðar við tæknifrjóvgun á sjúkrastofnunun. Ríkisstjórnin mun því þurfa að taka afstöðu til þessa atriða áður en frumvarpið verður lagt fram, en réttarstaða samkynhneigðra hefur enn ekki verið tekið formlega til umræðu meðal ráðherranna. Árni Magnússon félagsmálaráðherra sagði í ávarpi á Hinsegin dögum í gær að hann myndi beita sér fyrir því að samkynhneigðir öðlist fullan rétt á við gagnkynhneigða á sviði hjúskapar og ættleiðinga. Björn Bjarnason dómsmálaráðherra hefur ekki verið jafn afdráttarlaus í svörum en segir æskilegt að sem víðtækust sátt náist um næstu skref í þessum málaflokki og að hann muni vinna að einstökum úrlausnarefnum í samræmi við það sjónarmið. Aðspurð hversu bjartsýn forysta Samtakanna 78 sé um að ríkisstjórnin samþykki að taka skrefið til fulls segir Hrafnhildur Gunnarsdóttir, formaður þeirra, að þau hafi verið mjög bjartsýn hingað til og því hafi verið mjög ánægjulegt að heyra félagsmálaráðherra viðra jafnræðisviðhorf sín í ræðu sinni á Hinsegin dögum. Hún hljóti að telja það að það sé stuðningur innan ríkisstjórnarinnar við þau viðhorf. Aðspurð hvaða þýðingur það hefði fyrir samkynhneigða að ná þessum réttindum fram segir Hrafnhildur að þá yrði fullum rétti og jafnræði náð á við gagnkynhneigða íbúa landsins. Það væri fullnaðarsigur.