Stundvísi Icelandair minnst í vor

Icelandair er neðst á blaði hvað varðar stundvísi í flugi innan Evrópu í nýútkominni skýrslu Alþjóðasamtaka evrópskra flugfélaga. Stundvísi 27 flugfélaga er þar borin saman og Icelandair er í 27. sæti. Guðjón Arngrímsson, upplýsingafulltrúi Icelandair, segir að útkoma félagsins skýrist af óvanalegum töfum í flugi í vor, einkum milli Íslands og San Fransisco. Samanburðurinn sé yfirleitt mun hagstæðari. Guðjón segir tölum sem þessum hafa verið haldið út árum og áratugum saman og í alþjóðlegum samanburði sé Icelandair í þokkalega góðum málum, stundum sé það í efstu sætunum og stundum ekki. Guðjón segir enn fremur að mánuðirnir sem um ræðir, frá apríl til júní, hafi verið slæmir fyrir félagið. Tafir hafi orðið miklar vegna bilana í flugvélum, sérstaklega í einu tilviki þegar fljúga átti til San Francisco. Þá taki nokkra daga að ná leiðarkerfinu aftur á strik og það dragi félagið niður í þessum samanburði. Aðspurður hvaða þýðingu þessar niðurstöður hafi fyrir orðspor félagsins segir Guðjón að hann eigi ekki von á að þær hafi nokkra þýðingu. Ef samanburður yfir lengri tíma sé birtur sé félagið í mjög góðum málum. Þetta veki fyrst og fremst athygli hér á landi, íslenskir fjölmiðlar hafi áhuga á málinu en sem betur fer þyki sérstakt að Icelandair sé ekki í einu af efstu sætunum.