Tafir í nokkrar vikur enn

"Framkvæmdum miðar að öllu leyti samkvæmt áætlunum og ekkert stórvægilegt komið upp," segir Höskuldur Tryggvason hjá mannvirkjaskrifstofu framkvæmdasviðs Reykjavíkurborgar. Unnið hefur verið hörðum höndum að breytingum á tveimur af mestu umferðaræðum höfuðborgarbúa í sumar með tilheyrandi truflunum á umferð. Er þar um að ræða annars vegar breikkun á öllum gatnamótum Kringlumýrar- og Miklubrautar en því verki á að ljúka í lok þessa mánaðar en gatnamótin eru þau fjölförnustu á landinu. Framkvæmdir við Hringbraut eru einnig á áætlun en talsvert er þó enn í land þar og munu verklok vart verða fyrr en áætlað var eða um miðjan október. Er nú unnið að gerð undirganga undir Snorrabraut en hún er enn lokuð fyrir umferð af þeim sökum.