A-dúr hjá Brimkló og Beethoven

Ólafur hefur marga fjöruna sopið í tónlistinni en hann hefur verið bassaleikari í fjölmörgum hljómsveitum og nægir þar að nefna Sóldögg, Galileó og svo lék hann á tímabili í hljómsveit Páls Rósinkrans. Hann er einnig lærður kokkur. "Ég varð þó fljótlega að leggja pönnuna á hylluna þar sem fiski- og ölgersofnæmi voru mér til trafala á þeim vettvangi en ég er nú eiginlega bara þakklátur fyrir að svo fór, núna þegar ég lít til baka," segir Ólafur. En hvernig datt honum í hug að stofna tónlistarskóla? "Ég var að keyra Ragnar fósturson minn í tónlistarskóla í Reykjavík því allir tónlistarskólar voru troðfullir í Kópavogi þegar hugmyndin að Tónsölum kviknaði," útskýrir hann. En það getur tekið tíma og þrek að koma hugarfóstri sínu á legg en Ólafur vissi á hvað hann stefndi og hvað þyrfti til svo þangað yrði komist. "Ég var náttúrlega með þennan tónlistarlega bakgrunn en allt hitt vantaði svo ég fór í viðskiptafræði í háskólanum með það fyrir augum að læra að stofnsetja og reka svona batterí. En svo er ég mjög þakklátur fyrir að Kópavogsbær skyldi hafa kjark og metnað til að gera mér kleift að koma þessu á koppinn." En markmið Ólafs með skólanum er ekki einungis að verða við eftirspurinni við tónlistarkennslu í Kópavogi heldur ætlar hann að brydda upp á nýjungum við kennsluna. "Þessi skóli byggir á svokallaðri hryn forskrift þar sem áherslan er aðallega lögð á hrynjandi. Það felur í sér að laða kennsluefnið að nemandanum og því sem hann hefur áhuga á þannig að ég sem kennari leita á náðir Iron Maiden-laganna ef áhugasvið nemandans krefst þess. Það er hægt að fara svo margar leiðir við tónlistarkennslu enda er a-dúrinn eins hjá Bimkló og Beethoven," segir Ólafur og brosir við. Eflaust vildu margir vera fluga á vegg þegar áhugasvið nemanda krefst þess að þessi hugprúði bassaleikari bregði fyrir sig þungarokki eða pönki.