Bjórinn kominn í matvöruverslanir

Bjórinn er kominn í matvöruverslanir. Í verslunum Nóatúns er nú hægt að kaupa gasgrill og fylgir bjór í kaupbæti; bjórinn er því ekki seldur heldur er hann gefins. Áfengislögin virðast ekkert segja um gefins bjór. Samkvæmt Þjóðarpúlsi Gallup í febrúar á þessu ári vill meirihluti íslensku þjóðarinnar geta keypt bjór og léttvín í matvöruverslunum. Verslanir Nóatúns hafa nú fundið leið til að verða við þessum óskum almennings en þó fylgir sá böggull skammrifi að kaupa verður gasgrill til að fá bjórinn og má því segja að kippan kosti frá 15.900 til 19.900 krónur. Guðmundur Júlíusson, verslunarstjóri í Nóatúni, segir að þeir vilji engin leiðindi út af þessu og ef eitthvað „vesen“ muni skapast verður þessu hætt strax. Fram kemur í áfengislögum að innflutningur, heildsala, smásala, veitingar og framleiðsla áfengis í atvinnuskyni, án tilskilinna leyfa, sé ólögleg en hvergi er minnst á gjafir. Áfengis- og tóbaksverslun ríkisins hefur einkaleyfi á smásölu áfengis en rökin sem færð hafa verið fyrir áframhaldandi einkasölu hafa meðal annars verið þau að forvarnarhlutverk ÁTVR felist fyrst og fremst í því að fylgja eftir að þeir sem kaupa áfengi hafi náð lágmarksaldri. Afgreiðslufólk Nóatúns sýndi það þó og sannaði í dag að það gat vel sinnt þessu starfi líkt og ÁTVR þegar 16 ára stúlka á vegum Stöðvar 2 hugðist kaupa grill, hvort í sinni versluninni. Áður en tilboðið byrjaði var haldinn fundur með starfsfólki verslananna og ítrekað að ekki mætti selja vöruna einstaklingum yngri en tuttugu ára. Þar að auki afgreiða vakt- og verslunarstjórar grillið við kassann og ætti því enginn undir tvítugt að sleppa í gegn. En Guðmundur verslunarstjóri kveðst bjartsýnn á að hægt verði að kaupa léttvín og bjór í matvöruverslunum á næstunni.