Vel heppnað í alla staði

Íslandsdagurinn á Expo 2005 heimssýningunni sem haldin er í Aichi-héraðinu í Japan var í gær og tókst dagskráin í alla staði mjög vel að sögn Kristínar Ingvarsdóttur sem starfar fyrir Norðurlöndin á heimssýningunni. Halldór Ásgrímsson forsætisráðherra og Þorgerður Katrín Gunnarsdóttir menntamálaráðherra voru bæði gestir Íslandsdagsins ásamt fjölda listamanna. Meðal þeirra sem komu fram voru Ragnhildur Gísladóttir og Sigtryggur Baldursson sem léku tónlist japanska tónlistarmannsins Stomu Yamashta með fulltingi Skólakórs Kársness og Skálholtskirkjukórs, kvartett Sigurðar Flosasonar lék djasstónlist, Caput-hópurinn klassíska tónlist og Barði í Bang Gang steig svo á svið. Fylkisstjórinn í Aichi var gestur Íslandsdagsins og þykir það mikil virðing við listamennina. Nú þegar hafa yfir milljón gestir komið í sýningarskála Norðurlandanna og býst Kristín Ingvarsdóttir við því að gestafjöldinn muni fara yfir tvær milljónir áður en heimssýningunni lýkur.