Dennis spillir Kúbuför barnakórs

Ekkert verður af för Kórs Öldutúnsskóla til Kúbu þar sem mikil eyðilegging varð í landinu eftir yfirreið fellibyljarins Dennis á dögunum. Áætlað var að leggja af stað til Kúbu nú í morgunsárið, með viðkomu í París, og halda sömu leið heim eftir viku. Ytra stóð alþjóðlegt barnakóramót fyrir dyrum en hætt hefur verið við það. "Þarna varð mikill skaði, rafmagn fór af stórum hlutum bæja og borga og vatnslagnir og vegir í sundur," segir Egill Friðleifsson kórstjóri. Fjöldi híbýla eyðilagðist og heimilislausum var komið fyrir í hótelíbúðum í bænum Villa Olympia þar sem kórunum var ætlað að gista. Egill segir kórfélaga hafa vitaskuld orðið fyrir vonbrigðum enda tillökkunin mikil. "Undirbúningur ferðarinnar hófst í september og því mikið sjokk að ekkert verði úr. Peningasöfnun hefur staðið síðan í haust og ljóst að við töpum miljónum króna því ekki er hægt að tryggja sig fyrir náttúruhamförum." Hann segir fólk hafa tekið áfalllinu af stillingu og skynsemi og er þakklátur kórfélögum og foreldrum fyrir það. Sjálfur greip Egill til heimsfrægra og þrautreyndra Pollýönnuráða og þakkaði fyrir að kórinn var ekki á Kúbu þegar fellibylurinn gekk yfir. Utanferð Kórs Öldutúnsskóla hefur þó ekki verið slegin af með öllu því í sárabætur ætlar kórinn að fara í helgarferð til Parísar um næstu helgi. "Við erum ákveðin í að gera eins gott úr þessu og hægt er og ætlum að una okkur við söng og leik í París," segir Egill en meiningin er að syngja við sjálfan Sigurbogann sem heita má táknrænt fyrir hópinn. Egill hefur stýrt Kór Öldutúnsskóla í 40 ár og Kúbuferðin átti að verða hans tuttugasta, og um leið síðasta, kórferðalag. "Við höfum aldrei áður þurft að hætta við ferð en það hefur svosem ýmislegt komið uppá," segir Egill sem heimsótt hefur yfir 30 lönd í fimm heimsálfum með kórnum.