Sumarhátíð Vinnuskólans

Þrjú þúsund glaðbeittir unglingar gerðu sér dagamun í Laugardalnum í morgun þegar sumarhátíð Vinnuskólans var haldin í sautjánda sinn. Aðstandendur hátíðarinnar völdu svo sannarlega rétta daginn til hófsins, því sólin skein loks sínu skærasta í höfuðborginni í dag, eftir margar heldur gráar vikur. Íþróttaandinn sveif yfir vötnum og auk hefðbundinna greina var meðal annars keppt í hjólastólaralli, hjólböruhlaupum og kappáti. Eftir mikil hlaup og læti gerði svengdin skiljanlega vart við sig og sveittir starfsmenn sáu um að matreiða ógrynnin öll af pylsum ofan í mannskapinn.