Brýtur blað í DNA rannsóknum

Ef að líkum lætur mun uppgötvun Richards Kristinssonar réttarerfðafræðings auðvelda rannsókn alvarlegra glæpamála til muna. Hún gerir mönnum kleift að skera úr um á nokkrum mínútum hvort og hversu mörg DNA-sýni þarf að rannsaka og þannig sparast bæði tími og peningar sem sjaldnast er nóg af þegar um alvarleg afbrot á borð við nauðganir og morð ræðir. Erfðaefni mannsins eru af tvennum toga. Annars vegar svokallað hefðbundið erfðaefni sem erfist bæði frá móður og föður og hins vegar svonefnt hvatberaerfðaefni sem erfist aðeins frá móður. Hvatberaerfðaefni endast mun lengur í líkum en hefðbundin erfðaefni sem geta brotnað niður á tveimur til þremur mánuðum ef lík er til dæmis grafið í jörðu. Hvatberaerfðaefni eiga hins vegar á hættu að smitast af öðrum slíkum efnum og hefur slíkt torveldað rannsóknir. Uppgötvun Richards snýst um að aðskilja smit frá upprunalega hvatberaerfðaefninu. "Ég hef þróað aðferð til að skilja sýkingu frá upprunalega erfðaefninu. Þannig get ég séð á skömmum tíma hvort utanaðkomandi hvatberaerfðaefni hafa blandast hinu upprunalega og þau er þá hægt að setja í frekari rannsóknir," segir Richard. Hann er nú í doktorsnámi við University of Denver í Colorado í Bandaríkjunum en þar hóf hann nám í lífefnafræði og sameindalíffræði fyrir átta árum. Fyrir tilstuðlan og styrk bandaríska dómsmálaráðuneytisins hefur Richard þróað aðferðir sínar og nú hyllir undir að þær hljóti löggildingu í Bandaríkjunum. Mikill áhugi er þar í landi á aðferðinni því með henni má spara tugi og hundruð þúsunda króna við DNA rannsóknir. Hægt er að úrskurða um nauðsyn þess að senda sýni í frekari rannsóknir á sjö mínútum og fyrir jafnvirði 6.500 króna í stað þess að verja frá jafnvirði 65 þúsund og upp í tæp tvö hundruð þúsund króna sem DNA rannsókn kostar. Richard hefur í hyggju að flytjast til Íslands eftir tvö ár og opna hér rannsóknarstofu.